AMBON (info-ambon.com)-Upacara Kajadian Kota Ambon ke-450 berlangsung khidmat di lapangan Merdeka, Senin (8/9/2025). Upacara ini dipimpin langsung oleh Upulatu Kota Ambon, Bodewin Wattimena. Hadir pula Upulatu Maluku, Hendrik Lewerissa bersama nyora, Maya Baby Lewerissa, serta tamu undangan ama-ama deng pai-pai lainnya.
Dalam sekapur siri, Upulatu Maluku, Hendrik Lewerissa menyampaikan tema Kajadian Kota Ambon ke-450 tanggal 7 September, yaitu “Bergerak Bersama Ambon, Maluku, dan Indonesia Membaik”, yang menurutnya akang paleng bagus. Tema ini tidak sekadar taru asal taru saja, tapi pasang mulia yang mesti tatanam di semua warga kota Ambon pung hati.
“Supaya katong baku sayang, baku bantu, satu pung beban samua pikol sama-sama, satu pung susah samua rasa akang, lalu karja sama-sama par biking Bae supaya samua bisa dapat Bae tarus-tarus,” ujar Hendrik.
Beta mau bilang tema ini jang cuma story di mulu saja, tapi musti kasi tunju akang dalam kalakuang hari-hari, dalam karja hidup hari-hari baik kata itu ASN, pegawai swasta, Tentara, Polisi, orang tatua, mahasiswa, anak-anak sekolah sampai dengan anak-anak kecil.
Sejarah panjang negeri ini menjadi bukti par anak-anak cucu bahwa katong pung datuk-datuk su angka sumpah for baku jaga, baku dukung, baku sayang walaupun beda suku deng beda agama. Sampai oras ini masih tatanam di semua pung hati, ikatan pelaga gandong, ale rasa beta rasa, potong di kuku rasa di daging, sagu salempeng pata dua. Ini warisan adat dan luhur yang mesti katong jaga akang tarus-tarus.
Upulatu dan Ina Pati kota Ambon pung karja baru seumur jagong, kurang labe baru tujuh bulan terakhir ini, dong pung waktu mash panjang, karja juga masih batambong, tanggung jawab ada maliong. Tagal itu beta minta dong samua para pembesar, pegawai dan warga kota Ambon musti bantu dong dua.
“Baang dong dua seng bisa biking akang sandiri, dong dua pung kaki tangan pendek ibarat manyapu lidi akang seng bisa kasi barsih kalau cuma satu urat, saurat saja manyapu lidi seng bisa kasi barsih kintal, kalau akang su taika jadi satu baru bisa,” pesan Upulatu.
Sama dengan kota-kota lain di Indonesia, kota Ambon punya banyak masalah, ada masalah sampah, air bersih, lalu lintas tambah padat, layanan kesehatan, pendidikan, tata ruang kota deng masih banyak lai.
Upulatu deng Ina Pati pung motto “Beta Par Ambon, Ambon Par Samua.” Moto itu akang itu su batul deng cocok paskali for jaga deh biking Bae for kota Ambon.
Tapi beta mau kasi inga dong samua warga kota Ambon, pas di hari jadi ke-450 ini jang dong paripurna topi dada Beta Par Ambon kalau masih buang sampah takaruang. Jang bilang Beta Par Ambon kalau hidop suka langgar aturan parkir sambarang tanpa, bajual di bukan akang pung tanpa.
Dong yang ASN, jang bilang Beta Par Ambon kalau maso kantor talat, dudu-dudu di rumah kopi lalu laste pulang tempo, apalagi waktu di kantor cuma duduk tukel kiri kanan su bagitu bale barsunggut di balakang-balakang. Anak-anak sekolah jang bilang Beta Par Ambon kalau masih pamalas blajar, tiap hari maeng game, tukang bolos, seng dengar-dengaran apalagi suka baku undang lalu bakalai di jalan-jalan.
“Beta minta dong musti berubah dong musti robah kalakuang, mari katong biking par Ambon, mulai dari kalesang diri, kalesang rumah, kalesang kintal, kalesang karja, kalesang balajar, kalesang hidop orang Basudara,” ajak Upulatu.
Atas nama pemerintah deng masyarakat Maluku, Beta mau ucapkan selamat hari Kajadian ke-450 kota Ambon manise. Tuhan kirinya berkati Ambon pono-pono supaya Ambon pono deng cinta, pono deng damai antar hidop orang Basudara.(EVA)
Discussion about this post