AY Patty dan Tampa Sampah

DONG dua yang batamang bae, Onggo deng Dullah, bajalang kaki di jalang Alexander Yacob (AY) Patty. Ruas jalang yang berada di pusat kota Ambon. Sambil bajalang, Dullah bali air minong, yang dong isi dalang gelas plastic. Mangarti jua, jalang panjang jadi dong dua aos. Dullah bali 2, satu par dia lalu dia bage 1 par Onggo.

Dong dua ni, ambel titik star di muka kantor pemadam. Bajalang lurus lewat perpustakaan, rumah making king, tarus sampe di took simpang. Dong bali air minong, di toko satu disitu. Karena cuma akang di galas kacil, no rekeng stetok saja, air dong dua, talang abis.

Abis minong, ini yang perkara jadi; Onggo bakalai Dullah..Dullah bale bakalai Onggo lai. Untung kata di jalang basar, kal seng, dong dua su bakupukul. Barang kanapa lai ni, mari dengar dong dua bakumalawang:

Onggo: Dullah eee, jang se buang galas plastic tu dalang got…

Dullah: Barang kanapa Onggo, ale yang kas barsih akang ka…???

Onggo: Bukang bagitu, tapi kol ale buang, nanti bisa biking saluran tasumbat kio, lalu ujang turung, banjir…

Dullah: Masa cuma 1 galas saja, got bisa tasumbat, ale blajar akang dimana tu Onggo eee, mangkali beta buang galas 1 kontener ka…hahahaa…

Onggo: Kalau samua orang bapikir macang ale, maka batul sudah. Biar pemerintah kas turung pasukan 1 batalion lai, got ni, seng akang barsih. Kol ale piker bagitu, lalu 100 orang piker sama deng ale, maka ada 100 galas dalang got. No kalau 1000 orang pikiran macang ale,..hahaha, got pono Dullah eee, handeke….

Dullah: io eee, batul lai Onggo. Ale ni tado-tado mar pintar lai eee, dankje lai kawan eee, ale su kas inga beta.

Ehh ternyata, bakumalawang ini, adalah bakumalawang babak pertama. Sebab pas Dullah batal buang galas dalang got, persoalan baru muncul kumbali. Kali ini, Onggo bagiang dapat skot.

Dullah: Onggo, se larang beta buang sampah di got. No skrang, beta mo buang sampah ni dimana???

Onggo: Buang di tampa sampah jua, la mo buang di mana lai…

Dong dua tarus bajalang sambil carita, dan Dullah tetap tahang galas minong, untuk nanti mo buang di tampa sampah.

Carita pung carita, bajalang pung bajalang, tampa sampah di AY Patty seng dapa lia. Dong dua bacari kiri kanan, muka blakang, atas bawah, ternyata tampah sampah, cuma 1 buah di jalang mewah itu.

Akang pung soe lai, dong dua su bajalang lewat akang tampa sampah tu. Karena inga bakumalawang cuma karna sampah sapotong tu. Dan terpaksa, dong dua bale mangkali 200 meter menuju tampa sampah, lalu Dullah buang galas plastic sapotong tu disitu.

Dong dua penasaran deng keberadaan tampa sampah di AY Patty. Dong dua sisir ulang tampa yang dong dua bajalang, dan dong dua dapa kenyataan, bahwa memang tampa sampah di AY Patty mulai dari perpustakaan sampe di toko simpang, hanya 1 bua areng-areng. ***(nyonginfo)***

Post Author: Polly

Tinggalkan Balasan

Alamat email Anda tidak akan dipublikasikan. Ruas yang wajib ditandai *

This site uses Akismet to reduce spam. Learn how your comment data is processed.